قصيدة عيونك فجر (مع تسجيل صوتي)

عيونك فجر

ومين يقدر على عيونك

يا أجمل زهرة برية

يا أحلى بنت في الدنيا

يا حرية

***

جوه عنيكي أحلامك

جدايل نور

وشعرك زي أيامك

نغم و زهور

يبدد ليلك الأسمر

جدايل شعرك البنور

حواليكي ..بتترقص

وجوانا ..

حروف بتثور

ورحلة ..

في بحار الكون

وموج بيفور

***

دا شعرك ..

ولا ثورة شعب

بيتحدى فى طريقة الصعب

بضحكة طفلة في عينيكي

ورعشة ريشة  في ايديكي

بترسم بكرة ..
إللي جاي

بيتمايل على رموشك

وينشر في عيون الليل

أحلى ضي

***

ياليل الغربة مش حتطول

أنا فجرك

ونور شمسك

أنا نهرك

أنا موالك المهجور

وثورة في حنايا الدور

وفرحة في عيون بنور

يا أجمل زهرة برية

يا حورية

يا فجر النور

أمين رمضان / 21 أكتوبر 2013